रविवारचा दिवस केशकर्तनालयात गेला होतो तेथे रेडिओवर एक गाणे लागलेले होते. मेरे पिया गये रंगून वहाँ से किया है। टेलिफोन-तुम्हारी याद सताती है। बाजूला पाहिले तर प्रतिक्षेत असलले तीन- चार जण मोबाईलमध्ये गुंग झाल्याचे दिसले. परवाच सागर पावसात भिजत कामावर आला पण मोबाईल मात्र प्लॅस्टीकच्या पिशवीत मागच्या खिशात असा ठेवून दिला होता, की पाण्याचा एकही थेंब त्याला लागता कामा नये स्वतः रेनकोट वापरत नव्हता पण मोबाईलला मात्र पूर्णतः सुरक्षित ठेवत होता खरच या सहा इंच लांबीच्च्या व ३ इंच रुंदीच्या या मोबाईलमध्ये संपूर्ण जग सामावलेलं आहे.
फक्त बोलणेच नाही तर गाणी, रेडिओ, कॅमेरा, घड्याळ, इमेल, ईबुक, सगळेच या छोट्या डबीत तुम्हाला केव्हाही उपलब्ध असते. घरात बसून सगळ्या जगाशी तुम्हाला संपर्क साधणे यामुळे सहज साध्य झाले आहे. पूर्वी मुलीला माहेरहून सासरी जाण्यासाठी एस.टी.त बसवताना आई-बाप म्हणायचे, पोहोचली की लगेच पत्र पाठव. आता मिस कॉल दे असं सांगतात. बरेच जण मिस कॉल आला की काय ते सहजपणे आपापल्या सोयीनुसार समजून घेतात. मुली तर आता एकमेकींना लाडाने शिव्या देताना स्वीच ऑफ, मिस कॉल, डीलीट, फॉरमॅट असे शब्द वापरतात. पुर्वी प्रेमपत्र मैत्रिणीला पोचवण्यासाठी लहान मुलाला चॉकलेटचे अमिष दाखवून चिठ्ठी पोहचवावी लागे. आता त्वरित मनातलं सगळं (मन की बात) सहजपणे मोबाईलद्वारे सांगता येते. मोबाईलमधील व्हॉट्सअॅप व फेसबुकच्या माध्यमातून आपण आपले उत्पादन किवा स्वतः विषयीची माहिती लाखो लोकांपर्यंत पोहचवु शकतो. ई-बुकवर पुस्तके वाचू शकतो पाहिजे ते फोटो घेण्यासाठी त्याचा वापर करता येतो. स्वीय सहायक म्हणूनही मोबाईलचा वापर करता येतो.
एकदा रात्रीच्या वेळी एक रिक्षा घाटातून सरळ दरीत कोसळली मागच्या कारमधील व्यक्तीने मोबाईलवरून १०० नंबरला कळवले क्षणार्थात फायर ब्रिगेड, डॉक्टर, अॅम्ब्युलन्स, पोलीसयंत्रणा उभी राहिली तीन जीव वाचले. एक मोबाईलचा कॉल तीन जीव वाचवण्यास कारणीभूत ठरला फुठेही ईप्सित स्थळी जाताना रस्ता, दिशा दाखवण्यासाठी देखील मोबाईलचा उपयोग होतो पण याच मोबाईलचा आज अतिवापर होत असल्याचे दिसून येतेय.
डोळ्यांवर दुष्परीणाम, कानाच्या ऐकण्याच्या क्षमतेत घट, एकलकोंडेपणा, वेळेचा अपव्यय अशा अनेक समस्या यामुळे निर्माण झाल्या आहेत. या मोबाईलच्या अतिवापरामुळे ब्रेन ट्युमरचा धोका वाढतो व मेंदूची कार्यक्षमता घटते तसेच डीएनएला देखील नुकसान पोहचू शकते अश्लील क्लीप्स, चित्रे सहज उपलब्ध झाल्यामुळे विद्यार्थी कामुक होवून चुकीच्या मार्गाकडे वळत आहेत गुन्हेगारी वाढत आहे महागडा मोबाईल खरेदी करण्यासाठी विद्यार्थी वाममार्गाचा वापर करू लागले आहेत गाडी चालवताना मोबाईलचा वापर केल्यामुळे अपघातांचे प्रमाण वाढले आहे रोज तरूण पिढी दोन ते तीन तास मोबाईलच्या वापरात व्यस्त असल्याने इप्सित ध्येयापासून दूर जात आहे सारखी मान खाली वाकल्याने मानेचा आजार, मणक्याचा आजार बळावत आहे. भावना काबूत ठेवता न आल्याने भांडणतंटा वाढू लागला आहे. अनेकांचे संसार उध्वस्त होऊ लागले आहेत. व्यभिचाराला प्रोत्साहन मिळू लागले आहे. लोक मोबाईलच्या व्यसनात, लहान मुले गेम खेळण्याच्या व्यसनात अडकली आहेत.
मोबाईलवर सारखा गेम खेळतो म्हणून वडीलांनी मोबाईल हिसकावून घेतल्याने १२ वर्षाच्या मुलाने पुण्यात आत्महत्या केली आहे. मोबाईलच्या अतिवापरामुळे ताण वाढत असल्याने डिप्रेशनचे रुग्ण दिवसेंदिवस वाढत आहेत. एक दिवस मोबाईल घरी विसरला तरी माणसे अस्वस्थ होत आहेत. दऱ्याखोऱ्यात कड्यावर सेल्फी काढण्याच्या नादात अनेक जण आपला जीव गमावत आहेत.
प्रक्षुब्ध पोस्ट टाकल्याने सामाजिक तणाव वाढत आहेत.
मित्रांनो, प्रत्येक गोष्टीचा फायदा आणि तोटा हा असतोच. म्हणून प्रिव्हेन्शन इज बेटर देंन क्युअर या वाक्याप्रमाणे मोबाईलचा अतिवापर करण्यापेक्षा पाहिजे तेव्हाच, हवा तेवढा वापर केला तर मोबाईल एक वरदान असेल. अन्यथा शाप !
आपला परिवार नागेबाबा परिवार
-डॉ. दत्ता कोहिनकर
(सुखी जीवनाची गुरुकिल्ली अर्थात मनाची मशागत या पुस्तकातून)
