🌹थांबण्याचे सामर्थ्य रागावर विजय 🌹

एका महिलेला छोट्या छोट्या गोष्टींवरून रागावण्याची फार वाईट सवय होती. तिची ही सवय तिच्या संपूर्ण कुटुंबाचा चिंतेचा विषय बनली होती आणि त्यामुळे घरात कलहाचे वातावरण निर्माण झाले होते.

ती महिलासुद्धा स्वतःच्या या सवयीमुळे त्रासून गेली होती. तिला लहान लहान गोष्टी वरून एकदम राग येत असे.

एके दिवशी त्यांच्याकडे, तिच्या पतीचे लहानपणीचे मित्र, सहपरिवार भेटायला आले. ते डॉक्टर होते. बोलता बोलता त्यांनी सहज विचारले, “काय म्हणताय वहिनी! कसं चाललंय तुमचं?” अचानक तिचे डोळे भरून आले, जणूकाही कोणी तीच्या दुखर्या मनावर फुंकर घातली असावी. ती म्हणाली, “मला फार लवकर राग येतो आणि इच्छा असूनही त्यावेळी मी राग आवरु शकत नाही. नंतर मात्र मला फार पश्चात्ताप होतो. या स्वभावामुळे माझी प्रकृती सुद्धा बिघडायला लागली आहे. मला कशातच रस वाटत नाही. असे वाटते, ह्या रागाने जणूकाही माझ्या जीवनातील सगळा आनंदच हिरावून घेतला आहे.”

डाॅक्टर मित्रानी शांतपणे त्या महिलेचे सर्व म्हणणे ऐकून घेतले. आणि नंतर तिच्याकडे पाहत प्रेमळ हास्य करत म्हणाले, “फक्त इतकंच ना वहिनी? अहो, आत्ताच काही दिवसांपूर्वीच वैज्ञानिकांनी रागावरती एक औषध शोधून काढले आहे. हजारो लोकांना त्याचा फायदा झाला आहे. मी ते औषध नेहमीच माझ्या बरोबर बाळगत असतो.” असं म्हणत त्यांनी आपल्या बॅगेतून एक बाटली बाहेर काढून तिला दिली आणि ते म्हणाले, “आता जेव्हा कधी तुम्हाला राग येईल, तेव्हा या बाटलीतल्या औषधाचे चार थेंब आपल्या जिभेवर ठेवायचे आणि 10 मिनिटे ते तसेच राहू द्यायचे किंवा जोपर्यंत तुम्हाला बरं वाटत नाही तोपर्यंत. 10 मिनिटापर्यंत तोंड अजिबात उघडायचे नाही, नाहीतर हे औषध काम करणार नाही.”

महिलेच्या चेहऱ्यावर आशेचा एक किरण उमटला आणि मग तिनं डाॅक्टरांनी सांगितल्याप्रमाणे औषधाचा प्रयोग चालू केला. जसा तिला राग येई, तसे लगेच ती औषधाचे थेंब तोंडात टाकत असे.तीने हा प्रयोग 15 दिवस चालू ठेवला.15 दिवसातच महिलेला राग येण्याचे कमी व्हायला लागले. ती खूप आनंदी राहू लागली. 15 दिवसानंतर ती आपल्या पतीबरोबर त्या डाॅक्टरांना भेटायला गेली. त्यांच्या चेंबरमध्ये जाताच, तिचे डोळे परत भरून आले, परंतु या वेळी ते अश्रू आनंदाचे होते. भरल्या डोळ्यांनी ती म्हणाली, “या औषधामुळे माझा राग जवळ जवळ नाहीसा झाला आहे. आता मला फारसा राग येत नाही आणि माझ्या कुटुंबात हल्ली शांततेचे वातावरण असते. मी जन्मभर तुमची ॠणी राहीन. राग घालवण्याच्या औषधाची अजून एक बाटली मला हवी आहे.”

डाॅक्टर एकदा परत थोडसं हसले, परंतु या वेळी त्यांच्या हसण्यात मिश्किलपणा होता. मग ते म्हणाले, “वहिनी, मी तुम्हाला कसलेही औषध दिले नव्हते. ते तर नुसते साधे पाणी होते!”

महिलेने आश्चर्यचकित होऊन विचारले, “मग मला राग येण्याचं कसं काय कमी झालं?” डाॅक्टर म्हणाले, “जेव्हा तुम्ही राग आल्यावर हे औषध तोंडात टाकून तोंड बंद ठेवत होतात, तेव्हा त्या विरामाच्या क्षणात तुमची क्रोधरुपी नकारात्मक उर्जा शांत होत होती आणि त्या क्षणी तुमची विवेक शक्ती जागृत होत होती.”

अशा प्रकारे आपण या क्रोधरुपी कुरुप उर्जेला, करुणेच्या एका सुंदर फुलांत रुपांतरीत करु शकतो.

मित्रांनो, आपल्यापैकी बरेच लोकं ह्या सवयीमुळे त्रस्त असतील आणि या क्रोधित होण्याच्या सवयीला घालविण्यासाठी कुठल्या ना कुठल्या तरी उपायाच्या शोधात असतील.

हार्टफुलनेस संस्थेचे वैश्विक मार्गदर्शक, डाॅ कमलेश डी पटेल(ज्यांना प्रेमाने आपण दाजी म्हणतो) म्हणतात, “पुढच्या वेळी जेव्हा तुम्हाला राग येईल, तेव्हा फक्त बघा की ह्या रागाचा ओघ माझ्यामधे कसा वाहात आहे. त्याला दाबून टाकायचा प्रयत्न करु नका. फक्त पूर्णपणे जागरूक व्हा. फक्त एवढेच काम तुम्ही जर साक्षीरूपाने केलेत, तर हे अंधारात दिसणार्या प्रकाशाच्या किरणाप्रमाणे काम करेल. जसे तुम्ही तुमच्या अंतर्मनात काय चाललंय, ह्याबाबत जागरुक व्हाल, त्याच क्षणी अचानक शांतता जाणवायला लागेल. जी उर्जा क्रोधाला इंधन पुरवत होती, तीच उर्जा शांतीला इंधन पुरवण्यास सुरुवात करेल. ही एक अशी अवस्था असेल जी या आधी तुम्ही कधीच अनुभवली नसेल. ही बदललेली परिस्थिती खुद्द त्या क्रोधामुळेच निर्माण झालेली असेल. जसं जसे आपण जास्त जागरूक होत जाऊ,तसे आपण आपल्या क्रोधापासून तितक्याच कमी वेळात दूर जाऊ.

क्रोधाला बाहेर प्रकट न करता,त्याला स्वतःमध्ये परिवर्तन घडवून आणण्यासाठी आपल्याकडे वळवून घ्या.”

आपला परिवार नागेबाबा परिवार

-अज्ञात लेखक